LUGO EN PÉRENCHIES

ESTAMOS EN PÉRENCHIES PARA REMATAR O TRABALLO INICIADO EN LUGO!

Despois dun longo día de viaxe ata o norte de Francia para atoparnos de novo cos nosos socios, xa amigos, da Escola Sainte Marie à Pérenchies, chegamos à Pas de Calais! En Pérenchies estaban agardándonos as familias e os nosos compañeiros franceses.

Tras pasar o domingo coas familias con todo tipo de plans e visitas, os mozos e mozas Erasmus traballaron o luns no Collège Sainte Marie en diferentes obradoiros: fixeron escalada, cociñaron, coseron unha bolsa-merenda ecolóxica, xogaron e, por suposto, coñeceron a vila! Foi un día intenso e moi construtivo!

Ao día seguinte visitamos a vila de Ypres para coñecer o episodio máis doloroso da historia desta rexión francesa. No museo da l Guerra Mundial en Ypres, descubrimos a través de hologramas, vídeos e vestixios orixinais da Gran Guerra a crueldade e o devastador efecto que o conflicto tivo na rexión. Visitamos tamén un dos tantos cemiterios da Gran Guerra e puidemos ver as trincheiras dende as que os soldados pelexaban. Alí contáronnos o episodio da Tregua de Nadal: durante o Nadal de 1914 os soldados dos diferentes bandos enfrontados saíron das súas trincheiras para intercambiar saúdos, comida e souvenirs, e remataron cantando panxoliñas. Un episodio inédito que pon de manifesto o absurdo das guerras.

Xa pola tarde, percorremos a fermosa cidade de Lille onde tamén comemos algunha larpeirada, cortesía dos nosos anfitrións... Merci beaucoup! Que día tan magnífico!!

E continuamos con máis días intensos en Francia! É casi imposible resumir todo o que fixemos cos nosos socios franceses... Obradoiro de expresión teatral, asistimos a unha representación, traballamos no proxecto, convidáronnos a xantar "frites", limpamos de plásticos a praia de Bray, compartimos xeados... Non paramos de ver e aprender!

O último día da nosa estancia pasámolo traballando no proxecto, pois había que escribir conxuntamente os artigos para a revista virtual que pronto estará lista!

A tarde xa foi de acción e deporte. Moi perto do colexio desfrutamos dun parque onde estivemos patinando, xogando ao golf, ao fútbol ... .

Como despedida, celebramos unha "soirée" coas familias ... e probamos todo tipo de manxares típicos da zona.

E así fomos chegando ao final do intercambio co Collége Sainte Marie. E foi magnífico!

Merci beaucoup, nos amis!! C'était fantastique! Merci!